Was wetsch in New York, wo d Sproch nid versteihsch?
Was wetsch in Dubai, wo d Hitz nid vertreisch?
Was wetsch in Berlin, döt heds doch viil z viil Lüt?
Was wetsch in Paris? ussert dem grossa Turm isch das doch nüt.

Doch es git dah es Tal, wo für mi magisch ischt.
Bi ünsch ischt jeda per du, egal vo wo, dassd bischt.
Tradition isch wichtig. Das lernt ma dah scho als Kind.
Dah isch jeda es Original oder a Walsergrind.

Fahri d Chlus duri, geihd miar z Härz grad uf.
Wil dah bi ünsch hani alles, alles was i bruuch.
Niana sus fühli mi daheimet wia im hübscha Prättigau.
Direkt ar Landquart dra fühli mi wohl wia d Sau.

Statt uf St. Tropez gahni uf St. Antönia.
Statt z Graz kamas au z Jenaz ganz schön ha.
Es git en Fläck dah wird wenig glitta.
Er isch döt zwüscha Klosters und Seewis Schmitta.

Viil gönnd z Schlössli durus, gah stifta uf Chur.
Doch d Ruah und Zfriedahait findensch nur dah ir Natur.
Ob d Narzissa in Seewis oder d Salginatobelbrugg.
Das Tal isch wia a Magnet und zücht mi wieder zrugg.