Er kann sich alles kaufa, usser dr Astand wonem fählt.
Es gäbt eifacheri Wäg, doch er hed dä für sich gwählt.
Er handelt mit Bitcoin, z Handy immer griffbereit.
Bi ihm muass was abgah, wil er d Ruah nid vertreit.
Sini Frau isch em gliich,
wichtig isch, dass dr Kurs stiigt.
Für Kids heder kai Ziit,
Wil döt kai Geld hanga bliibt.

Er lehnt sich dri und isch trotzdem nid vorna drbi.
Gseht nid ih, wia glücklich er eigentli könnt si.
Doch schneller als er denkt, isch alles verbi.
So wia er hani nia wella si.

Dia Wält isch volla Wunder, wenn du an si glaubsch.
Alles wird guat, wenn du diar selber vertrausch.
Überlahn dem Kind in diar endlich wieder d Zügel.
Lahn dini Seel Pilot si und es wachsend diar Flügel.

Si gaht gära go laufa, wil si so vergisst, was fählt.
Si hed nid wella allai si und genau drum ihn gwählt.
Si handelt im Affekt, wenn si ihri Kind aschreit.
In ihra isch was defekt, wil si d Ruah nid vertreit.
Ihra Maa isch ihra gliich,
si isch afa würklich so wiit.
Nia findet er für si Ziit,
Wil döt kai Geld hanga bliibt.

Wia gfesslet isch si und es bessert au ni.
Si gseht nid ih, wia glücklich si eigentli könnt si.
Doch schneller als si denkt, isch alles verbi.
So wia si hani nia wella si.

Dia Wält isch volla Wunder, wenn du an si glaubsch.
Alles wird guat, wenn du diar selber vertrausch.
Überlahn dem Kind in diar endlich wieder d Zügel.
Lahn dini Seel Pilot si und es wachsend diar Flügel.